Þann 1. maí tekur sumaropnun sýninga gildi og verða þær opnar alla daga 13.00-17.00, helgidaga jafnt sem virka daga. Afgreiðslutími bókasafns er óbreyttur, 13.00-18.00 virka daga svo einnig er hægt að sjá sýninguna Gleym þeim ei til kl. 18.00 virka daga, en hún er á sömu hæð og bókasafnið. Ekki er tekinn aðgangseyrir á þá sýningu en frjáls framlög vel þegin. Sumaropnunin gildir fram til 1. september. Við bjóðum gesti innilega velkomna að sækja söfnin heim í sumar!
Sýningin Gleym þeim ei verður opnuð á sumardaginn fyrsta kl. 15.00. Eftir opnun verður hún opin virka daga frá 13.00-18.00 og frá 1. maí alla daga 13.00-17.00 (til 1. sept. þá tekur vetraropnun aftur við). Undirbúningur er í fullum gangi - hönnuður er Heiður Hörn Hjartardóttir.
Fimmtudaginn 16. apríl 2015 opnaði Illugi Gunnarsson mennta- og menningarmálaráðherra við hátíðlega viðhöfn vefinn einkaskjalasafn.is sem er samskrá yfir einkaskjalasöfn á landinu. Vefurinn er afrakstur samstarfsverkefnis Þjóðskjalasafns, héraðsskjalasafnanna og Landsbókasafns - Háskólabókasafns og vonast er til að með honum batni aðgengi að heimildaflokknum. Rúmlega 5000 færslur eru komnar inn á vefinn, þar af eru 130 frá Héraðsskjalasafni Borgarfjarðar. Unnið verður að því að koma fleiri skráningum inn á vefinn. Þjóðskjalasafn Íslands hefur umsjón með vefnum sem það einnig á og rekur.
Sýningaropnun - Á sumardaginn fyrsta (23. apríl) n.k. verður opnuð ný sýning í Safnahúsi. Hefur hún hlotið heitið Gleym þeim ei og er hönnuður hennar Heiður Hörn Hjartardóttir. Sýningin er að mestu leyti samvinnuverkefni skjalasafns og byggðasafns og er framlag
Á sýnngunni verður sögð saga 15 kvenna af starfssvæði Safnahúss, frá Haffjarðará og að Hvalfirði. Markmiðið er að draga nöfnin fram úr djúpi gleymskunnar. Allar voru þær á lífi árið 1915 þegar konur fá kosningarétt. Verkefnið er unnið í víðtæku samstarfi, með fjölskyldum kvennanna og öðrum tengiliðum sem setja saman fróðleik um þær sem mun liggja frammi á sýningunni. Með leyfi höfunda fara gögnin svo í heild á Héraðsskjalasafn Borgarfjarðar til varðveislu til framtíðar. Verkefnið hefur verið í undirbúningi síðan snemma hausts 2014 og sýningin stendur í hálft ár eða fram til októberloka.
Tónleikar - Á opnunardaginn verða ennfremur tónleikar, afrakstur samstarfs við Tónlistarskóla Borgarfjarðar um listsköpun ungs fólks og með aðkomu Héraðsbókasafns Borgarfjarðar. Í Safnahúsi hefur verið tekið saman ljóðasafn fjögurra borgfirskra kvenna. Nemendur skólans velja sér texta og vinna með hann undir handleiðslu kennara á vorönn. Við opnun sýningarinnar Gleym þeim ei flytja þau svo eigin verk við ljóðin, það verður aðaldagskrárliður opnunarinnar, sem verður á sumardaginn fyrsta (23. apríl) kl. 15.00. Á bilinu 10-15 verk verða flutt á tónleikunum og er yngsta tónskáldið aðeins sex ára. Er skólastjóra og kennurum Tónlistarskóla Borgarfjarðar þakkað afar farsælt samstarf um þetta þróunarverkefni sem nú kemur til framkvæmda í þriðja sinn.
Sýningu Loga Bjarnasonar, Morphé, er nú lokið. Á þriðja hundrað manns kom og sá verk hans, en þema sýningarinnar er hreyfing. Starfsfólk í Safnahúsi þakkar Loga fyrir afar áhugaverða sýningu og óskar honum góðs gengis í áframhaldandi listsköpun.
Þess má geta að næsta sýning hússins er sýningin Gleym þeim ei sem opnuð verður 23. apríl n.k. Sagt verður nánar frá henni við síðara tækifæri. Við opnun hennar verða hátíðartónleikar í samstarfi við Tónlistarskóla Borgarfjarðar, þar sem flutt verða frumsamin lög nemenda við ljóð fjögurra kvenna frá Ásbjarnarstöðum í Stafholtstungum.
Aðsókn að Safnahúsi hefur verið afar góð það sem af er ári, bæði á bókasafn og list- og byggðasýningar.
Byggðasafninu barst merkur gripur á dögunum, gamalt altari frá Hjörsey á Mýrum. Því fylgdi sú saga að það væri ekki úr síðustu kirkju þar heldur enn eldri kirkju. Því má gera því skóna að það sé að minnsta kosti 150 ára gamalt. Kirkja var aflögð í Hjörsey árið 1896. Hún tilheyrði Hítarnesþingum en kirkjur þar voru þá þrjár, á Kolbeinsstöðum, Ökrum og í Hjörsey. Gefandi altarsins er Magnús Þórarinn Öfjörð, en það var síðast í eigu móður hans, Sigríðar Jónsdóttur miðils. Á fyrri hluta 20. aldar var það í eigu Auðar Rútsdóttur, en móðir hennar var Sigríður, dóttir Guðjóns Jónssonar sem var bóndi í Hjörsey 1879–1883. Hálfbróðir Sigríðar Guðjónsdóttur var afi gefanda: Jón Guðjónsson. Altarið ber eilítil merki þess að hafa lent í bruna. Það er málað viðarmynstri í brúnum lit og í því eru tvær hillur. Með þessari fallegu gjöf fylgdi altarisdúkur sem Sigríður Jónsdóttir hafði saumað þegar hún var nemandi á Varmalandi um 1950.
Lokað er í Safnahúsi yfir páskana, dagana 2. apríl til og með 6. apríl. Opnað verður aftur kl. 13.00 þriðjudaginn 7. apríl.
The museum is closed from April 2th to April 6th. We open again tuesday 7th of April.
Í dag fagnar Þorsteinn Þorsteinsson lífefnafræðingur frá Húsafelli níræðisafmæli sínu. Þorsteinn er mörgum Borgfirðingum að góðu kunnur og hefur sinnt ýmsum fræðistörfum og ritað fjölmargar sérfræðigreinar í erlend tímarit og innlend. Eiginkona hans er Edda Emilsdóttir meinatæknir og eru börn þeirra fjögur: Ingibjörg, Björn, Þorsteinn og Margrét. Þorsteinn hefur verið ötull velgjörðarmaður safnanna, lagt þar inn efni og miðlað af yfirgripsmiklum fróðleik sínum. Jafnframt hefur hann lagt Sögufélagi Borgarfjarðar lið og skrifað greinar í Borgfirðingabók m.a. um ógleymanlegar persónur í héraði og starfshætti sem brátt eru að gleymast.
Starfsfólk Safnahúss Borgarfjarðar óskar Þorsteini innilega til hamingju með tímamótin.