Tónlistarskóli Borgarfjarðar og Safnahús Borgarfjarðar hafa á undanförnum árum unnið saman að því að hvetja ungt fólk til að semja tónlist við borgfirsk ljóð. Verkefnið ber vinnuheitið Að vera skáld og skapa og fer þannig fram að í Safnahúsi er unnið að vali efnis, gjarnan í samvinnu við viðkomandi skáld eða fjölskyldu þess. Þegar vali er lokið er ljóðahefti útbúið og sett í hendur nemenda. Þeir velja sér texta úr heftinu og semja lög við. Ennfremur ákveða þeir flutningsmátann og frumflytja verkin undir handleiðslu kennara sinna á opnum tónleikum í Safnahúsi á sumardaginn fyrsta. Verkefnið byggir á ákvæði í menningarstefnu Borgarbyggðar um frumkvæði, sköpun og menningararf. Það hefur fengið afar jákvæð viðbrögð, bæði hjá nemendum skólans og fjölskyldum þeirra, svo og hjá sveitarstjórn Borgarbyggðar og íbúum í héraðinu.
Um 180 nemendur stunda nú nám við Tónlistarskóla Borgarfjarðar sem starfað hefur í rúm fimmtíu ár. Safnahúsið hefur verið við lýði síðan um 1960. Báðar stofnanir eru í eigu Borgarbyggðar og vinna að þessu verkefni þvert á fagsvið sín. Verkefnisstjórar eru Sævar Ingi Jónsson og Sigfríður Björnsdóttir skólastjóri Tónlistarskólans.
Á árinu 2018 tók markmið og textaval sérstakt mið af fullveldisárinu og horft var til ástar á landinu eins og hún kom fram í ljóðum skálda. Voru höfundar fulltrúar ýmissa tímabila. Árið 2019 lágu ljóð eftir Böðvar Guðmundsson til grundvallar. Á árinu 2020 var unnið með ljóðasafn eftir Þorstein frá Hamri (1938-2018). Til stóð að uppskerutónleikar verkefnisins yrðu haldnir í áttunda sinn á sumardaginn fyrsta, þann 23. apríl 2020 kl. 15.00. Með tilliti til sóttvarna og samkomubanns var þeim frestað og það fyrirkomulag haft á árinu 2021 að flutningur nemenda á tónsmíðunum var tekinn upp og miðlað rafrænt. Má sjá og hlusta á verkin á þessari slóð: Unga fólkið og Þorsteinn frá Hamri – Safnahús Borgarfjarðar (safnahus.is)
Þegar er farið að huga að hugmyndum um efnisval fyrir árið 2022.
Nokkrar myndir frá tónleikum verkefnisins.