Borgfirskir höfundar

Um nokkurt skeið hefur verið unnið að samantekt á upplýsingum um borgfirska höfunda og hagyrðinga á vegum Héraðsbókasafns. Merkur áfangi liggur nú fyrir í nafnalista þar sem sjá má á fimmta hundrað nafna. Listann hefur Sævar Ingi Jónsson héraðsbókavörður sett saman. Sérstakur styrktaraðili verkefnisins er Akkur, styrktar og menningarsjóður VM- Félag vélstjóra og málmtæknimanna. Eru stjórn sjóðsins færðar miklar þakkir fyrir trú hennar á gildi verkefnsins.  Tekið skal fram að listinn er ekki fullbúinn, verkefnið verður í vinnslu áfram um óákveðinn tíma og uppfærist jafnóðum hér á síðunni.

Markmið verkefnisins er að taka saman lista yfir skáld og hagyrðinga á starfssvæði Safnahúss (frá Hvalfirði og að Haffjarðará á Snæfellsnesi) fyrr og síðar og setja fróðleik og/eða myndir undir hvert nafn. Verkefnið er viðamikið, en hér lítur fyrsti verkþáttur dagsins ljós, þ.e. fyrsta útgáfa af höfundalista.

Sveitarfélögin sem hér um ræðir eru þessi (2016): Borgarbyggð, Skorradalshreppur, Hvalfjarðarsveit. Tengsl höfunda við svæðið geta verið með ýmsum hætti en helst er horft til eftirfarandi þátta: fæðingarstaðar, búsetu, lengri tíma dvöl. Jafnt er horft til skáldskapar, vísnagerðar og fræðiskrifa. Útgáfa er ekki skilyrði þess að nafn höfundar verði sett á listann. Það skal tekið fram að þrátt fyrir ofangreind viðmið verður mat á því hvaða nöfn verða á listanum alltaf að einhverju leyti huglægt og mörkin óljós.

Með þessu verður mikilvægum heimildum um bókmenntasögu Borgarfjarðarhéraðs safnað á einn stað.  Þar hefur ætíð verið rík bókmenning. Má þar nefna Júlíönu Jónsdóttur sem fyrst kvenna gaf út ljóðabók, Jón Helgason,  Guðmund Böðvarsson, Kristmann Guðmundsson, Stefán Jónsson og Halldóru B. Björnsson. Einnig má nefna höfunda og skáld fornsagnanna eins og Egil Skallagrímsson og Snorra Sturluson. 

Borgfirskir höfundar – nafnalisti 2017

Tekið skal fram að listinn er ekki fullbúinn, verkefnið verður í vinnslu áfram um óákveðinn tíma og uppfærist jafnóðum hér á síðunni.

Ljósmynd efst: Ljóðbrot eftir Guðmund Böðvarsson frá Kirkjubóli.

Ljósmyndir neðst (Héraðsskjalasafn Borgarfjarðar): Guðmundur Böðvarsson, Guðrún Halldórsdóttir, Sigríður Helgadóttir, Valdís Halldórsdóttir, Snorri Hjartarson, Ragnheiður Magnúsdóttir, Guðmundur Sigurðsson og Guðrún Jóhannsdóttir.