Starfsemi

Safnahús er safnaklasi þar sem fimm söfn eru til húsa:

  • Byggðasafn Borgarfjarðar
  • Héraðsbókasafn Borgarfjarðar
  • Héraðsskjalasafn Borgarfjarðar
  • Listasafn Borgarness
  • Náttúrugripasafn Borgarfjarðar

Safnahús er í eigu Borgarbyggðar en þjónar einnig Hvalfjarðarsveit og Skorradalshreppi með þjónustusamningum. Í starfi hússins er mjög tekið mið af menningarstefnu Borgarbyggðar þar sem m.a. er kveðið á um lifandi miðlun menningararfsins og fræðslu til ungs fólks og hvatningu til listsköpunar.

Grunnsýningar Safnahúss eru tvær, Börn í 100 ár sem sett var upp vorið 2008 og Ævintýri fuglanna sem var opnuð í apríl 2013. Báðar eru þær hannaðar af lista- og handverksmanninum Snorra Frey Hilmarssyni og eru á neðri hæð Safnahúss. Hafa sýningarnar báðar hlotið lof fyrir listræna og hugkvæma framsetningu menningarfsins og henta einkar vel til safnfræðslu. Á efri hæð hússins er Hallsteinssalur þar sem settar eru upp tímabundnar sýningar, oft listsýningar en einnig byggðasýningar af ýmsum stærðum og gerðum.

Auk sýninga flest mikill hluti starfseminnar í ýmiss konar verkefnum er tilheyra faglegu safnastarfi. Má þar nefna móttöku gagna og muna, flokkun og skráningu, rannsóknir, greinaskrif og skráningu í gagnagrunna. Starfsemi bókasafnsins tekur einnig mið af þessu og flest verkefni sem unnin eru í húsinu eru unnin í samvinnu tveggja eða fleiri safna.

Ýmis minni verkefni er stuðla að miðlun menningararfs og safnfræðslu eru á dagskrá Safnahúss árlega. Má þar nefna þátttöku í sameiginlegum verkefnum safna á landsvísu, sumarlestur barna og Sagnakvöld þar sem nýjar borgfirskar útgáfur eru kynntar.

Safngeymslur eru á þremur stöðum, í geymsluhúsi við Sólbakka og í aðstöðu grófari muna í Brákarey auk geymslulofts í Safnahúsinu sjálfu.

 

Ljósmynd: Ævar Þór Benediktsson sýnir krökkum vísindalegar tilraunir. Myndin er tekin árið 2011 á uppskeruhátíð Ljóðasýningar barna sem haldin var í Safnahúsi um árabil (á vegum Héraðsbókasafns). Þess má geta að Ævar Þór er héðan úr héraði og var í barnæsku tíður gestur í Safnahúsi.