Að vera skáld og skapa

Tónlistarskóli Borgarfjarðar og Safnahús Borgarfjarðar hafa á undanförnum árum unnið saman að því að hvetja ungt fólk til að semja tónlist við borgfirsk ljóð. Verkefnið ber vinnuheitið Að vera skáld og skapa og fer þannig fram að í Safnahúsi er unnið að vali efnis, gjarnan í samvinnu við viðkomandi skáld eða fjölskyldu þess. Þegar vali er lokið er ljóðahefti útbúið og sett í hendur nemenda. Þeir velja sér texta úr heftinu og semja lög við. Ennfremur ákveða þeir flutningsmátann og frumflytja verkin undir handleiðslu kennara sinna á opnum tónleikum í Safnahúsi á sumardaginn fyrsta. Verkefnið byggir á ákvæði í menningarstefnu Borgarbyggðar um frumkvæði, sköpun og menningararf. Það hefur fengið afar jákvæð viðbrögð, bæði hjá nemendum skólans og fjölskyldum þeirra, svo og hjá sveitarstjórn Borgarbyggðar og íbúum í héraðinu.

Um 170 nemendur stunda nú nám við Tónlistarskóla Borgarfjarðar sem starfað hefur í rúm fimmtíu ár. Safnahúsið hefur verið við lýði síðan um 1960. Báðar stofnanir eru í eigu Borgarbyggðar og vinna að þessu verkefni þvert á fagsvið sín. Verkefnisstjórar eru Guðrún Jónsdóttir forstöðumaður Safnahúss og Theodóra Þorsteinsdóttir skólastjóri Tónlistarskólans.

Á árinu 2018 tók markmið og textaval sérstakt mið af fullveldisárinu og horft var til ástar á landinu eins og hún kom fram í ljóðum skálda. Voru höfundar fulltrúar ýmissa tímabila, alveg til samtíma. Árið 2019 lágu ljóð eftir Böðvar Guðmundsson til grundvallar. Á árinu 2020 verður unnið með ljóðasafn eftir Þorstein frá Hamri og mun Ástráður Eysteinsson prófessor annast efnisval.

Uppskerutónleikar verkefnisins verða haldnir í áttunda sinn sumardaginn fyrsta, þann 23. apríl 2020 kl. 15.00, í Safnahúsi.

Nokkrar myndir frá tónleikum verkefnisins.